Avokati i Prokurimeve merret me ankesat e paraqitura nga çdo individ ose grup individësh përfaqësues ligjorë, autoritete publike ose çdo kandidat, tenderues dhe operator ekonomik në lidhje me veprime të paligjshme ose të parregullta, ose mungesë veprimi nga autoritetet kontraktore në prokurimin publik apo dhënien me koncesion.
Në bazë të këtyre ankesave ose me nismën e tij, Avokati i Prokurimeve mund të fillojë hetimin e procedurave kur vëren ose dyshon se ka pasur shkelje të këtij ligji.
Në të gjitha rastet, Avokati i Prokurimeve njofton të interesuarit për veprimet e tij brenda pesë ditëve nga dita e marrjes së ankesës. Kur nis një procedure hetimi, ai ua njofton vendimin e tij Agjensisë së Prokurimit Publik (APP) dhe të gjithë personave të interesuar brenda pesë ditëve nga marrja e ankesës ose menjëherë pasi, me nismën e tij, ka marrë vendim për të filluar një procedurë hetimi.

Në rastet kur Agjencia e Prokurimit Publik është duke shqyrtuar një ankesë me të njëjtin objekt, Avokati i Prokurimeve bashkërendon veprimet për realizimin e hetimit.
Pas hetimit Avokati i Prokurimeve merr vendim për t’i dërguar informacion APP-së për shkeljet ligjore të vëna re dhe kërkon mbështetje në vendimmarrje për trajtimin e ankesave apo dhënien e masave administrative ndaj personave përgjegjës.

Nëse Avokati i Prokurimeve gjykon se një zyrtar i autoritetit kontraktor ka kryer një shkelje të qëllimshme të këtij ligji ose dyshon se ka kryer vepër penale ia raporton shkeljen autoritetit kompetent